17 красавіка, на базе Жлобінскага гісторыка-краязнаўчага музейнага комплексу прайшла рэспубліканская навукова-практычная канферэнцыя, прысвечаная 85-й гадавіне першага вызвалення Жлобіна ад нямецка-фашысцкіх захопнікаў у ліпені 1941 года.
Арганізатарамі мерапрыемства выступілі аддзел ідэалагічнай работы і па справах моладзі Жлобінскага райвыканкама, гаспадары сустрэчы і дзеючы пры музейным комплексе клуб «Краязнаўца». Удзел у канферэнцыі бралі вучоныя-гісторыкі з Мінска, Гомеля і Рагачова, жлобінскія краязнаўцы і настаўнікі гісторыі, а таксама прадстаўнікі Жлобінскага клуба калекцыянераў Беларускага рэспубліканскага грамадскага аб’яднання калекцыянераў (БелРГАК).
З прывітальным словам да іх звярнуўся намеснік старшыні райвыканкама Аляксандр Салаўёў.
Наогул, Жлобін у 1941 годзе быў вызвалены двойчы: спачатку 3 ліпеня (батальён капітана Івана Панцялеева), а потым – 13 ліпеня, пасля таго як фашысты зноў на кароткі час захапілі горад (батальён капітана Фёдара Баталава). За гэты подзвіг Фёдару Баталаву, тады ўжо маёру, 9 жніўня 1941 года было прысвоена званне Героя Савецкага Саюза. 17 жніўня мужны воін загінуў. Дакладнае месца яго пахавання да 2025 года не было вядомым. У мінулым годзе астанкі Героя былі знойдзены і ідэнтыфікаваны. Гэта стала магчымым дзякуючы жыхарцы вёскі Старая Рудня, ветэрану педагагічнай працы Наталлі Пятроўне Іванчанка, якая была сведкай пахавання Фёдара Баталава, а таксама намаганням камандзіра Жлобінскага пошукавага атрада «Дняпроўскі рубеж», намесника старшини Савета Жлобiнскага клуба калекцыянераy БелРГАК Аляксандра Лукашука, яго таварышам і садзейнічанні пракуратуры Жлобінскага раёна, раённага аддзела Следчага камітэта і Стараруднянскага сельвыканкама. На канферэнцыі аб гэтых пошуках падрабязна расказаў Аляксандр Лукашук. Дарэчы, падчас мерапрыемства яму была ўручана падзяка Інстытута гісторыі Нацыянальнай акадэміі навук Беларусі.
Пра значэнне контрудара на Дняпры летам 1941 года, першых вызваліцеляў Жлобіна – воінаў 117-й і 154-й стралковых дывізій 63-га стралковага корпуса, пра спробу здзейсніць контрудар у бок Бабруйска і пра бой пад вёскамі Чырвоная Слабада і Сенажаткі (там фашысты страцілі шмат сваіх танкаў), пра мужнага камкора Леаніда Пятроўскага і гібель за адны суткі пад Жлобінам адразу трох савецкіх генералаў (адзіны выпадак за ўсю гісторыю Вялікай Айчыннай вайны), подзвіг ваенфельчара Ніны Ляпінай і генацыд беларускага народа расказалі навуковы супрацоўнік Цэнтра ваеннай гісторыі Беларусі Інстытута гісторыі НАН Беларусі Павел Ждановіч (Мінск), прадстаўнікі Гомельскага дзяржаўнага ўніверсітэта імя Ф. Скарыны кандыдаты гістарычных навук Станіслаў Чаропка і Дзмітрый Талочка, загадчык аддзела Гомельскага палацава-паркавага ансамбля Румянцавых і Паскевічаў Юрый Панкоў, жлобінскія краязнаўцы Алег Попчанка, Барыс Мінееў, Раіса Талканіца і аўтар гэтых радкоў.
Адзначым, што амаль усе гэтыя выступленні ўвайшлі ў кнігу «Жлобин, 1941. Дважды освобождённый», сігнальныя экзэмпляры якой убачылі свет у жлобінскай друкарні напярэдадні канферэнцыі і былі прэзентаваны на ёй, а потым падараваны райвыканкаму і навукоўцам з Мінска і Гомеля. Яе асноўныя аўтары – члены клуба «Краязнаўца» Алег Попчанка, Аляксандр Лукашук, Аляксандр Пішчала, Раіса Талканіца, Барыс Мінееў, аўтар гэтых радкоў, а таксама старшы навуковы супрацоўнік Жлобінскага гісторыка-краязнаўчага музейнага комплексу Кацярына Цісецкая і прафесійны гісторык Павел Ждановіч. Рэцэнзентамі кнігі сталі згаданыя вышэй кандыдаты гістарычных навук Станіслаў Чаропка і Дзмітрый Талочка.
Камандзір Жлобінскага пошукавага атрада «Дняпроўскі рубеж», намесник старшини Савета Жлобiнскага клуба калекцыянераy БелРГАК Аляксандр Лукашук быу узнагароджаны падзякай Iнстiтута гiсторii Нацыянальнай акадэмii Республiкi Беларусь.
Ссылка на источник:
https://share.google/ubjDfSeDrRJIbDs5h
Прэс-цэнтр БелРГАК.